81歲殿堂級歌手葉振棠之前因身體狀況唔好，去年開告別紅館演唱會，話唔再開大型個唱，，今年佢同其他歌手聯合開騷後，呢日開記招宣布喺11月至12月期間，分別喺唔同場地舉行個唱，棠哥唔擔心被人罵佢出爾反爾，仲專程請主診醫生李家仁嚟到記招，證明自己身體健康，可以應付高強度嘅演出。
李家仁指棠哥經歷COVID及生蛇後，身體而家非常好，中氣十足，棠哥話做3個鐘頭嘅演唱會，身體狀況百分之一百冇問題，佢坦言身體最壞情況係喺2023年，當時做咗演唱會第一part，第二part已經頂唔順，直情係起唔到身，入醫院搞咗好耐，好在一路康復。
棠哥去年開紅館演唱會時，佢覺得身體冇問題，但係醫生勸棠哥年紀大要唞吓，棠哥話呢一年覺得身體幾好，想繼續享受喺舞台上嘅歡樂。
棠哥之前開騷有邀請《中聲》唱將演出，提攜後輩，呢次演唱會就邀請《中聲3》冠軍黃博做其中一位嘉賓，棠哥就話仲度緊，細節要遲啲再話畀大家知。
