賈靜雯 同 修杰楷 呢對恩愛夫妻呢日分別出席活動，賈靜雯呼籲熟齡人士打疫苗，而修杰楷就號召大家參與慈善馬拉松。佢哋兩公婆趁暑假帶咗兩個女去夏威夷long stay成個月，期間遇上海嘯警報，靜雯呢日講返件事仍然心有餘悸。
靜雯話當時自己同二女咘咘一齊，見證車流紛紛逃離海邊，雖然心情好緊張，但為咗安撫囡囡自己必須保持冷靜，直至返到住處見到老公同另外兩個女就忍唔住爆喊，因為有種劫後餘生同家人重聚嘅感覺。
講到為人父母最擔心嘅一定係仔女生病，不過靜雯就話仔女病得越犀利，父母越應該保持冷靜，好似細女波妞曾經兩次發高燒到42度，好彩佢冷靜觀察，判斷合適嘅降溫方法，先可以做出最恰當嘅處理。佢又話為咗幫女兒強身健體，而家開始會訓練佢哋跑步曬太陽。
老公修杰楷喺另一個活動上就話有日前帶咗兩個囡囡去跑步，跑咗五個圈總共1.5公里，事後獎勵佢地食雪條，不過佢就大爆太太靜雯當日有工作在身，所以未有同佢地一齊跑，更笑言太太因此「逃過一劫」。
