呢個星期日播出嘅《女神配對計劃》展開校園篇，著晒校服力追女神，而三位踢館嘅求愛勇者就以插班生形式加入戰團。佢哋包括讀緊護士嘅健美先生 胡溢文 、熱愛動漫嘅足球教練 Cyrus謝嘉豪 以及之前因簽證問題離開節目嘅說唱歌手 Jay榮嘉爾 。
來自烏茲別克嘅Jay再次回歸節目，係為咗兌現同女神 梁敏巧 嘅承諾，Jay再見Maggie加上感受到女神熱情嘅反應，密密喺耳邊幫忙做翻譯，雖然Maggie似乎更心儀律師Matt，但Jay依然覺得有機會攻略女神，希望兩人關係更進一步。
重溫《女神配對計劃》浪漫時光
跟館嘅大隻仔胡溢文一心為咗 李芷晴 而加入節目，佢一入到課室自信嘅表現，仲令原來嘅求愛勇者感到威脅，大聲話覺得自己可以做得更好。由於佢係健美先生，仲惹來原本嘅求愛勇者挑機，要派出Matthew同佢鬥大隻，最終發現高大嘅Jay手瓜先係最粗。事後胡溢文透露，因為睇完女神李芷晴係節目中喊住懷疑自己係咪唔適合談戀愛，所以先勇敢參加節目，希望令女神重拾自信。
而Cyrus本身係一位遊戲直播主，又會玩Cosplay，興趣上同女神Yuki簡直超級夾，搞到林俊其都有啲擔心Yuki被牽走，Cyrus亦㨂咗Yuki做攻略對象，仲親自承認自羅絲粉(Yuki粉絲名)身份。
插班生挑選完心儀嘅女神後，大家一齊玩女神過去常識問題比賽，唔少問題仲公開女神們嘅黑歷史。眾多女神中 關嘉敏 讀書時試過因為犯錯而要見家長，Carman兩位隊員Matthew同細John都有答中。不過兩人就被一張陳年貼紙相考起。而 梁敏巧 中學時曾心儀大隻體育老師，求愛勇者Matt一估就估中。最後Jay、GM同Eddie同樣有7分表現得最好。
下一集開始節目會大變陣，9月8號起會星期一至五晚22:30播出最後告白篇，12位求愛勇者中成績最差嘅5位會被淘汰，而9月14號星期日晚21:30會播出Final Chapter，大家到時就會知道女神情歸何處喇。
《女神配對計劃 最後告白》 9月8號起 逢星期一至五 22:30 翡翠台
《女神配對計劃》FINAL CHAPTER 9月14號 21:30 翡翠台