繼上星期嘅大灣區選拔之後，《中聲4》嘅海選今日重返香港區舉行， 肥媽 周國豐 張佳添 同海兒 繼續為大家評選新一屆入圍選手，當中唔少參加者都有豐富實力，好似早前由洛杉磯移居澳門嘅音樂人「MJ」Matthew Johnson咁，唔止有唔少演出經驗，呢日輕鬆歡快嘅演出亦大受好評。
亦有曾於台灣出道嘅 戴柏諺 ，近年轉任主持人同物業顧問嘅佢，演出一樣令評審以及收睇網上直播嘅觀眾滿意。
以英語歌曲參與嘅 高孟然 過往亦曾參加台灣選秀節目，目前亦係一名獨立唱作人。同樣來自台灣嘅小學老師 林雷諾 ，身為原住民一開口澎湃唱腔就功力十足。佢哋仲分享點解會跨海來港參加嘅原因。佢哋原來仲分別同上屆亞軍 張與辰 非常有淵源。
至於海兒同添Sir，就非常歡迎來自世界唔同地方嘅朋友參加新一屆比賽，更話各地選手都非常臥虎藏龍呀。
其中一位參加者，原來仲係96年港姐季軍 袁彩雲 嘅叔叔，來自德國嘅特地返港參加，仲係侄女推薦佢參賽，佢仲話試過參與過已經心滿意足咁話呀。另外電影界亦有朋友一齊玩，好似演出過《新喜劇之王》同《水餃王后》嘅 伍國寶 ，而 李松華 更係電影投資者，年前深受社會事件啟發嘅《白日之下》佢就有份參與喇。
亦有乖仔為咗鼓勵爸爸參加而出戰 張偉晉 就指因為父親怕醜，於是身先士卒投身海選，希望以歌舞演出令爸爸改變心意呀。
而由北京返港嘅 羅陽 參賽經驗豐富，仲身為男團企劃，本來想旗下成員參與嘅佢仲話因為大家都未夠最低年齡，於是改為自己出賽呀。
廖雯指自己近年經歷唔少低潮同挫折﹐由紐約返港嘅佢以渾厚聲音演出。而健康學博士詹越嘅身形完全睇唔出已年屆花甲，更係六孩之母。
至於近來花邊新聞多多嘅 張佳添 早前被指力追TVB高層 樂易玲 復又指同 甄采浠 發展地下情一齊睇戲非常親密，呢日佢亦親自回應感情狀態，指雙方都係單身並非男、女朋友，亦直認係浪子，亦係無腳雀仔，飛翔得非常自在，仲呼籲各位男士繼續追求對方呀。