風車草劇團11月底將會上演全新劇目，並搵嚟首度參演舞台劇嘅 Yoyo岑寧兒 演出，編劇兼主演嘅 梁祖堯 解釋由於呢次舞台劇以感性行先，當中有好多劇情都會以音樂去表達，既然呢個劇要唱歌，所以佢哋就邀請咗Yoyo一齊演出：「我諗呢次會係一個療癒嘅旅程，希望呢部戲俾到大家一種勇氣同埋動力，就是好好諗返嗰啲好好嘅嘢，偷偷地記住嗰啲美好嘅嘢，然後就繼續向前行，儘管唔知第時係點，或者第時會更加差還是點都好，但是喺呢一刻都有一種勇氣行落去。」
喺劇中將飾演鐵嘴護士長嘅Yoyo，原來喺求學時期係辯論隊成員，阿祖笑言自己知道時都wow咗一聲，但當見多幾次後，就會明白Yoyo點解係辯論隊成員。Yoyo則笑言自讀書參加過辯論隊之後，都冇乜機會可以盡情咁mean，所以自己都好期待呢個故事。至於係咩原因令佢答應演出？Yoyo表示：「我都鍾意睇舞台劇，中學都有上過戲劇堂，主要因為今次有音樂嘅部份，如果唔係有唱歌部份，我未必有把握挑戰，相信大家一齊可以做到一個好嘅表演。」
早前梁祖堯、岑寧兒、邵美君、Ahdee湯駿業等主演已經開始圍讀，對於新手Yoyo嘅演出身為監製嘅 Ahdee 讚不絕口：「當Yoyo一開聲試讀，我哋都覺得『有啊！』，佢嗰種感覺，係大家平時好少見到佢嗰面，有喜感，鐵嘴得嚟又貼到心。」
