吳浩康（Deep）早前為賺錢養家，毅然轉行做「職安真漢子」，獲得廣大觀眾支持，帶挈人氣急升，吳浩康依然未有放棄音樂夢，最近更擔任無綫電視歌唱選秀節目《聲秀》導師，佢早排與音樂人兼好兄弟陳思捷（Cedric）隨宣明會去非洲烏干達五天探訪交流，從當地難民身上見證無數堅韌嘅力量與希望，其中單親媽媽Rose嘅故事，更啟發吳浩康重新思考與家人嘅關係。
吳浩康喺烏干達探訪之旅，與逃離戰火嘅難民交流，吳浩康坦言未出發前，對烏干達完全零認識，探訪過後，發現係一個貧瘠嘅國家幫忙另外一個貧瘠國家：「我覺得烏干達政府，對蘇丹及南蘇丹嘅難民，真係好大嘅支援，起碼有得逃離自己嗰個國家戰火嘅危險。」
吳浩康呢次前往Bidibidi難民營及Adjumani難民收容中心探望難民，被單親媽媽Rose故事深受觸動，Rose帶住十個小朋友，四個係親生、其他係親戚同寄養，當中更有三個存有殘障嘅問題，吳浩康續道：「我諗唔少都市人都經歷過婚姻問題，已經好困擾、好傷，Rose結婚，之後自己嘅國家有動盪，要走難、面對生死，諗住去新嘅地方開始新生活，又因為生咗有殘疾嘅細路仔，老公好嫌棄佢，覺得佢有罪，於是離開佢。Rose，一個被嫌棄嘅人，冇嫌棄其他人，自己都未餵得飽，仲要餵十個細路仔，嗰個愛好大。」
吳浩康坦言喺都市生活，家庭成員間冇經歷過特別大嘅共同難關，對比身處困境嘅難民，大人走難帶住十幾個細路，有啲係侄仔、外甥或阿嫂跟大哥一齊走，吳浩康都反省係咪要到咁危急，先可以放低自己嘅想法，同屋企人相處：「有危難嘅時候，可能最會幫你嘅，就係平日同你鬧交嗰個兄弟姊妹，如果係咁，喺平安嘅時候，又何必太挑剔對方？有時嬲，係因為我哋太得閒，真係會咁，不如多啲包容。」
吳浩康亦有感而發：「 （難民）佢哋做錯啲咩？佢哋做啱晒都冇用，冇得揀幾時、點樣發生，就係發生咗……佢哋畀我好大力量，『希望』係同環境冇關，『希望』係關自己個心事，唔係要有證據先有希望，係有希望先會發現曙光。」吳浩康又指近年得到大家欣賞與嘉許，其實受之有愧：「我只係個普通中年男人，一班地鐵有好多嗰種，嘉許我，我好多謝、好開心。但係實在有太多人同我一樣，甚至做得比我更好。我個仔今年九月先三歲，好多人已經養到仔女長大成人，嗰啲係咪更值得欣賞？大家用睇我嘅角度睇吓你老公，就會發現佢比呢個所謂真漢子做得多十倍，但係講（表達欣賞）少一百倍。」
吳浩康透露完成探訪回家，睇到阿仔便衝過去抱抱，假如將來有機會，吳浩康都希望阿仔去探訪、親身體驗；此行亦為佢帶嚟創作靈感，吳浩康將與Cedric合寫音樂作品，而佢嘅樂隊Closer亦會再就此創作：「應該至少有兩首歌，希望九月尾音樂會前，有個好粗糙嘅錄音。另外，會同Closer自資出歌，個人方面暫時都自資先，開始鋪墊自己嘅演唱會。」吳浩康受難民營兩位義教畫畫嘅老師啟發，計劃義教幫助有需要嘅基層人士學習唱歌。
