粵劇出品人暨總策劃 彭美施 去年推出嘅新編粵劇《忠烈楊門》首演四場口碑不絕，近日終於公佈10月載譽重演，於西九文化區戲曲中心大劇院連演三場。
施姐於發布會指： 「今次很開心尹飛燕一口就答應演佘太君角色，再加入了麥文潔、黎耀威、黃寶萱、莫華敏等，同時劇情更重家國情懷，整齣戲節奏會更緊湊，為讓觀眾有更新的視聽效果。」
有全才花旦之稱嘅名伶 尹飛燕 從藝60年來都飾演花旦，今次首次演百歲掛帥佘太君，燕姐話：「自己答應後先感到心驚驚，原來都好有壓力，我嘅心係好開心，但又好緊張，因為我從未試過做老旦，今次係新嘗試。其實每一個演員都需要等一個機會，我好好彩，等到施姐俾我一個咁好嘅機會去學習演一個老旦。」
提到角色早前由 汪明荃 演出，燕姐就認為每位演員演繹都會有唔同效果，佢會參考京劇做手身段比較硬朗，仲表示要向戲中老公廖國森請教。森哥就指於燕姐面前自己只係後輩，仲透露呢次重演已收到好多朋友嘅訂票要求，更指自己唔介意繼續重演呀。
飾演楊宗保嘅梁兆明同演穆桂英嘅梁燕飛，以及反串楊文廣嘅梁非同，呢日就話重新改動嘅劇本，將更感人肺腑。而再次反串嘅梁非同，仲話會與再改進演繹方式。
今次梁兆明太太 麥文潔 將粉墨登場演柴郡主楊六娘，本已為粵劇花旦嘅佢，婚後主力相夫教子，廿多年來只係偶爾演出，今次再踏舞台嘅佢話： 「收到邀請心情好激動，其實我亦等一個演出機會，我會努力演出呢個角色，亦不能有負觀眾期望。」梁兆明為支持太太更出錢又出力，為太太添置戲服，又鼓勵太太追求演出滿足感。
