葉童同 黃德斌 領銜主演嘅舞台劇《唔講得》9月初將喺文化中心大劇院重演，各下午同晚間場尚餘少量門票正公開發售。
四位演員葉童 黃德斌 楊永德 同 翁煒桐 早已展開新一輪排練，葉童對劇目重演非常高興：「咁短嘅時間再重演，我諗觀眾支持係最大嘅原因，所以相當之開心。」而德斌就話：「今次我哋有啲新嘅環節，我同葉童會互唱，佢唱下我、我唱下佢，同埋今次會有兩位演員做我哋個仔，一個負責音樂部份，一個就負責台詞部份。其實每一次喺唔同嘅地方，觀眾現場俾到嘅反應對我嚟講都係唔同嘅感覺，變咗我希望自己喺每一場戲，都可以俾到自己同觀眾新鮮感。」
葉童亦都話：「唔知係咪因為導演都聽見我話鍾意唱歌，所以特登加呢個環節比我呢？我自己演員生涯其中一個目標，就係希望有機會去演一個音樂劇。呢個戲我哋去過唔同地方演出，每次我都有新感受，呢個戲講兩性之間嘅關係，每一次每一埸戲我都有唔同嘅感覺唔同嘅體會，所以非常期待再次喺香港同大家見面！而Gordon (李俊樂)同埋阿拼(翁煒桐) 呢兩位咁出色嘅年輕演員都會一齊出現係我哋個戲度。」
藝術總監胡恩威就指：「《唔講得》2024年做一次，今年又再做，幾個演員好似樂手咁，台詞變成音樂，演員即興咁去Jazz，大家都係用廣東話呢個咁美麗嘅聲音，去將成個演出呈現出嚟，其實係睇咗果啲應該再睇，未睇嘅更加一定要睇。」
監製陳善之則指：「其實你話咁快重做，都唔算快喇，演員都好忙冇期，所以延遲到9月，喺廣州同馬來西亞我哋都好開心，冇諗過咁Local港式嘅劇喺呢兩個唔同地方都可以得到咁大嘅迴響，今次重做有好多好得意嘅事，葉童同德斌會唱歌，我覺得個戲好啱大家睇，甚至乎一路都有人問巡演，蘇州、杭州、成都都有問，我哋都要夾演員檔期，同埋場地各方面，希望明年有機會喺內地行一個圈。」