胡諾言 同 陳琪 結婚多年堪稱圈中模範夫婦，兩人育有三名子女，而上周六胡仔生日，太太同子女特別為佢慶祝，仲揭露外表Man爆嘅胡仔充滿童心，係人氣公仔Labubu嘅超級粉絲。
當日胡仔收到太太精心準嘅Labubu蛋糕，令佢相當驚喜！胡仔將照片上載社交平台後，亦得到胡定欣、姚子羚、陳自瑤、鄭俊弘等藝人朋友同粉絲嘅祝福。胡仔趁生日亦公布工作大計:「大一歲啦，我都祝自己順順利利，最新工作安排就係加入咗邵氏大家庭，成為我的經理人，除咗繼續拍攝《流行都市》之外，我都會即將開拍邵氏新劇《風華背後》，入面蔡少芬係我上司，有好多對手戲，好多年前同蔡少芬喺綜藝節目合作過，所以都好期待再合作。」
胡仔亦提到鍾情Labubu嘅原因：「太太都鍾意，啲女冇乜太大感覺，反而係我就一見鍾情。可能因為我好鍾意小朋友關係，我一見到Labubu就好震撼，覺後佢好似一個BB咁，真係好正，但我絕對唔係一個狂迷，唔會用天價、非買不可咁搜購，但老婆特別準備呢個蛋糕，好開心好驚喜，都真係好多謝佢。」
而開心事陸續有嚟，胡仔喺社交平台曬出夫妻倆同長女Jayjay喺中學頒獎禮上嘅合照，開心分享Jayjay獲頒獎學金嘅好消息，佢仲話：「我讀書唔叻，社會大學畢業。佢讀書叻我少少，希望胡小姐繼續努力。」唔少網民都話Jayjay叻女，仲讚佢生得好靚女呀。
