陳奕迅歷時兩年多，全球巡演182場嘅演唱會，早前於澳門圓滿落幕。為記錄呢次音樂之旅， 2-CD嘅演唱會現場實錄喺本月 25號正式推出，至於2-Blu-ray 則於10月面世。
今次現場實錄嘅 2-CD 選用咗香港場嚟錄製CD，原因係香港紅館嘅歌單，正三係呢個騷嘅靈魂，Eason興奮表示：「裡面主要收錄2022年12月30日當晚的演出，如果大家想重溫當晚表演，就終於可以聽到。」問到如果要佢喺碟中揀一首最鍾意嘅歌，Eason就為大家推介《如果這一秒鐘你跟我講你不愛我》，佢話：「好聽，很有力量，這首歌是在《黑夜不再來》之前，哈哈，大家聽一下。」
呢次演唱會令歌迷們發掘到唔少滄海遺珠，對此Eason笑道：「很多人跟我說過，這次演唱會重新演繹了一些舊歌，他們當新歌不停地聽，聽得很開心，hit 過當年出碟時，不是說笑。很開心它們不再是滄海遺珠，又很感謝大家都欣賞這些滄海遺珠！」
現場實錄2-Blu-ray 預計於10月面世，不過喺網上已經可以付費觀看，唔少行內人睇過後都驚嘆Eason今次又創下香港演唱會現場實錄嘅製作及剪輯新高鋒，30多部機同時喺紅館錄影及剪輯，直追國際級歌手嘅演唱會實錄水準。
演唱會創意總監朱祖兒喺製作特輯中，直言自己睇第一剪時都感到非常震撼：「我真是很久沒有看香港歌手的演唱會Blu-ray ，因為以前的拍法及剪接手法很平淡，看外國歌手那些Blu-ray ，全都很厲害，香港何時能追上？終於Eason做到了！」佢仲溫馨提示大家如果睇網上版嘅話，最好用大屏幕去睇，配上較好嘅音響設備，先可以感受到製作團隊及剪輯師嘅心血。
Eason亦坦言睇完呢個現場實錄，為佢帶嚟前所未有嘅震撼，同時笑言自己終於可以變返一個觀眾去睇呢個騷：「最多謝剪接師Tiff ，佢花了很多時間做，為我留下了一個非常非常好的紀念，人生第一次看自己的現場實錄，可以多角度去欣賞，再不是從前的剪輯跟紀錄方法。」
而Jerald(陳哲廬)則解構演唱會現場錄音嘅CD，整張唱片都冇喺Eason聲音上做過 AutoTune，堅決保留咗佢嘅呼吸、顫抖：「就是要你聽見最震撼的現場靈魂，那個是陳奕迅呀，不是其他人，他在我耳邊唱了182場，我可以說沒有一場感覺悶，每一場都聽出耳油，每一次演繹首歌，他都為大家帶來不同層次和感覺，我為何要將他的聲音變AI，根本沒必要做任何修音，我反而要很小心捉住他每一個情緒的感覺，保持他每一下投入唱時的情緒感覺，這些才是世上最珍貴的錄音！」
演唱會完結後，Eason馬不停蹄為演唱會紀錄片於香港、中國內地、吉隆坡等地作巡映，每站都會有放映及分享會與歌迷見面，目前Eason已經去咗北京、成都、上海、深圳及吉隆坡，而9月尾會再到台北宣傳，完成呢站後呢次紀錄片見面分享會便告一段落。
