曾任成龍助手多年，後來不歡而散嘅 段偉倫 因病離世，終年67歲。當年曾同佢一同於成龍身邊任職嘅 盧惠光 向傳媒證實消息，有報道指段偉倫因腎病逝世。
段偉倫早於1970年代已加入亞洲電視，成為當時亞視小生之一，後來轉投無線電視但多演出小角色。
段偉倫後來於工作嘅車行認識成龍，展開15年緊密合作關係。段偉倫成為成龍助手，不僅負責日常行程安排，同時亦係其貼身保鏢，與盧惠光當時被稱為成龍嘅左右護法。後來佢亦於多部電影作品現身，好似《警察故事III超級警察》、《重案組》、《醉拳2》、《鼠膽龍威》、《霹靂火》、《千王之王2000》等，都見到段偉倫身影。
段偉倫曾指自己曾救成龍一命，佢指將成龍由車輛救出後，車身未幾突然爆炸。可惜兩人最終仍分道揚鑣。佢曾指2000年代被成龍解僱時，遣散費只有十多萬港元。當年更曾指成龍係「無良僱主」對對方態度極感失望。
