90年代娛圈女神 楊采妮 （Charlie）喺1992年時因與郭富城Aaron合作拍廣告結緣，隨後又為Aaron拍攝歌曲《You & Me》，當時Charlie憑一張清純面孔一鳴驚人，堪稱90年代女神，時至今日Charlie雖然年屆51歲已為人母，依然擁有一張不老面孔，人美心善，獲封「永遠玉女掌門人」！
Charlie定居新加坡後甚少在香港露面，但佢間中都同朋友聚舊，最近返港就同相識超過30年嘅小美飯聚，兩人8年冇見面，不僅有說不完嘅話題，Charlie嘅初心更令小美難以忘懷。小美喺社交平台貼出同Charlie嘅合照，再加上一啲以前合作時嘅舊照，見Charlie保養得宜狀態好好，相比幾十年前變化不大，好多網民睇到後都激讚。
小美同時發長文釋出與好友敘舊嘅感受，Charlie當年17歲仍係一個中學生，就為Aaron拍咗一個廣告及MV，之後就展開玉女生涯，「Charlie由小妹子到玉女偶像，再成為演員、導演、再成為別人的妻子和母親」，小美又指喜歡Charlie善良、對朋友好又念舊，Charlie仲送咗得意公仔餅畀小美，令小美捨不得放入口，Charlie更為Aaron帶來特辣辣椒醬。
小美當晚與Charlie無所不談，直至餐廳打烊都傾得唔夠喉，透露食飯嗰陣發生小插曲，侍應捧住2碗湯上碟，心急拿唔穩，Charlie嗰碗倒瀉，差啲淥到手，Charlie第一反應不斷問侍應：「你有沒有淥親？」見Charlie一共問咗3次，小美深深覺得Charlie嘅善良從不變。
另外，商台DJ雲妮亦Po咗一張同楊采妮頭貼頭嘅合照，睇得出兩人交情非淺，雲妮話同Charlie縱使不常相見，但會把對方放喺心上，有講唔完嘅話題，雲妮形容采妮係佢人生中嘅柔順劑，「她的溫柔總令我感到舒服自在，感恩我們三十三載的友情不變」。