姚焯菲（Chantel）去年以「Academic High Distinction」榮譽從奧克蘭拔萃女校畢業，其後佢更登上學校頂尖學生榜獲Top Scholars榮譽，被揭IB文憑試考獲40分或以上成績，Chantel獲封學霸，佢即將離港前往美國入讀紐約大學，成為天后Lady Gaga及Taylor Swift師妹，Chantel日前接受電台訪問，分享歌唱事業追夢與學業之間點去平衡。
Chantel喺離港前接受港台訪問，透露喺新西蘭讀書嗰陣覺得唱歌同讀書，兩件事一齊做好辛苦，仲試過崩潰，Chantel有一段時間唔想返香港，後嚟佢安慰自己，捱過呢段時間就可以，捱過去先可以去到下一步。
Chantel坦言曾受網上負評影響，一度陷入自我懷疑，「有啲人會話『你點做都唔會成功』、『點唱都係咁難聽』」，Chantel認為別人都講得啱，呢個世界叻過自己嘅人有咁多，有諗過自己係咪唔適合喺呢個圈，「我係咪好似霸咗個位？我係應該退出呢」，後嚟Chantel想通咗，覺得追夢係為自己，要尋覓自己嘅夢想，首先要慢慢搵番自己嘅初心，諗番其實自己係適合去做呢件事，繼續努力向前行！
