被網民封花名「的士陳」嘅陳偉霆（William）北上發展多年，一直緋聞唔算多，自2019年被爆出同內地超模何穗私下聚會，再到2021傳出拍拖同居消息後，兩人雖然冇正面向大眾發布戀情，但呢幾年佢哋嘅地下情屢傳離離合合，直至舊年有網民發現William同何穗把臂同遊日本，令二人關係再次掀起揣測。
William早前喺內地正忙於開拍新劇，不時被網友捕捉到片場開工消息，而何穗則四個幾月冇更新小紅書，就連微博嘅內容都一次清空不留任何痕跡，事件牽扯到William同何穗嘅關係再度被熱議。有網民話佢哋一直冇分手，亦有人話兩人復合後關係昇華已低調結婚，甚至準備秘密產子。更有指何穗近半年冇接新代言及大型時尚活動等工作，疑似低調退圈，享受過少奶生活。
翻查資料見何穗最後喺4月中下旬於社交平台更新過一輯疑似工作照，以及與友人到海邊玩樂嘅相，身穿泳裝嘅何穗當時身材依然Fit爆，喺黃昏日落玩得好開心。
