由TVB主辦嘅全城矚目選美盛事《2025香港小姐競選決賽》 將於本周日（31號）晚上8點翡翠台現場直播，一眾佳麗喺賽前會晤評判，距離決賽仲有3日時間，14位佳麗已進入最佳狀態，喺台上率先展現喺過去呢段時間學習嘅談吐及儀態。
今屆擔任最上鏡小姐評判嘅任達華、余安安及樂基兒，就大讚今屆佳麗水準好高，安安姐話好難揀，樂基兒透露有啲心水，不過暫時唔講得。佳麗們事前唔知會晤邊位評判，事前準備都係落力做好自己，希望呈現最好一面畀大家欣賞。
9號陳詠詩覺得最緊要係保持心理狀態，叫自己唔好緊張，1號李尹嫣就話開始喺台上綵排，有一個好新體驗，大家都好興奮，好期待星期日參加呢個咁大型嘅節目。7號施宇琪話自己已到達目標體重，一共減咗18kg，目前唔再節食，想食得營養啲，等頭腦郁得快啲。
12號庄靜璟覺得大家都辛苦，排練到好夜，而13號袁文靜就話心情有啲緊張，之前佢唔識跳舞、行騷及唱歌，要接受好大挑戰，14號何詠多都覺得好緊張。
