67歲苗僑偉（三哥）跟戚美珍育有一對子女，大女苗彤（Phoebe）自大學畢業後留喺加拿大發展，曾舉辦個人攝影展，其後轉型做演員，參演多套作品，苗彤近日有份參演美國科幻喜劇《Upload》第四季亮相，佢喺社交平台分享劇照及花絮，並分享拍攝感受。
美劇《Upload》頭三季贏盡口碑，嚟到第四季苗彤都有份參演，苗彤近年轉型做演員，該劇講述人類死後意識可以上傳至雲端，繼續喺虛擬世界繼續生存，苗彤今次演一名上傳至伺服器內嘅貧窮戶。
苗彤指呢個係佢第一份工作之一，原本只係一份兩日嘅工作，結果變成六年後再次回歸，苗彤感謝該劇執行製作人Greg Daniels一路嘅陪伴，仲幫忙增加流量。苗彤認為作為一個演員，能夠同呢部劇一齊成長，並成為Upload大家庭嘅一員，無論以咩身份，對苗彤嚟講都意義非凡。
苗彤畢業於加拿大名校英屬哥倫比亞大學，苗僑偉早前講過阿女唔想靠父母名氣，選擇留喺外國發展事業，阿女直言唔想同爸爸合作，想公私分明，苗彤近年轉型做演員，亦靠自己努力獲得工作機會，曾演出逾廿部作品。
