33歲王敏奕（Venus）與曾國祥喺2019年結束6年愛情長跑拉埋天窗，老爺曾志偉喺二人結婚初期曾坦言恨抱孫，不過王敏奕講過與老公目前生活節奏唔適合迎接新生命，王敏奕暫未有造人大計，寄情工作發展，王敏奕近日喺驚慄片《空心人》挑戰演憶子成狂嘅媽媽，更獲佘詩曼及蔡卓妍（阿Sa）專程捧場支持。
阿佘今日喺IG貼出與王敏奕嘅合照，原來阿佘喺百忙中抽時間睇咗王敏奕主演新戲，更寫出自己嘅觀後感，表示自己諗到嘅係「珍惜眼前人」，目前仍係單身嘅阿佘，睇完呢套戲亦對夫妻相處之道有深刻體會。
阿佘認為每個人習慣咗帶住全日累積嘅負面情緒返屋企，或者當愛已成習慣，「忘記咗對方係好想人氹吓，做媽咪嘅顧住照顧子女，而忽略咗老公嘅感受，做老公嘅喺出面做嘢固然辛苦，返到屋企就變得沉默寡言，忘記咗當初結婚係基於互相欣賞而想一齊生活」，唔太珍惜對方，去到失去先嚟後悔，阿佘覺得珍惜身邊嘅人係好重要！
此外，阿佘亦好羨慕王敏奕有機會演出呢部過足戲癮嘅小品電影，同輝哥張兆輝嗰種夫妻感覺，莫明地令人睇得好舒服，阿佘又讚王敏奕冇嘥到任何一滴眼淚，作為一個尋求心靈救贖嘅好媽媽，佢覺得王敏奕演得好好，更預祝王敏奕提名最佳女主角。
