郭富城近期除咗忙於宣傳新戲，呢日亦抽空擔任一個選秀活動大使，仲即場大騷舞技，同來自世界各地嘅組合大跳經典作品《狂野之城》。
城城見到一班對舞台表演咁有熱誠嘅年輕人，即勾起初出道回憶。佢透露囡囡依家會參加歌唱比賽，認為係訓練勇氣嘅好好方法，所以假以時日就算囡囡想參加選秀，佢都一定會贊成。
城城貴為舞台王者，表演經驗豐富，佢都有意開班授課，將寶貴經驗傳承落去，城城強調夢想不分年齡，無論咩年紀都可以勇於表現自己。
城城早前出席活動，因為有粉絲太過熱情，差啲整親佢隻眼，有報道話佢當場訓斥粉絲，城城否認自己動怒，只不過係語重心長教導粉絲，追星之餘要保持冷靜，千祈唔好太激動！
