四位《中年好聲音》唱將顏志恒、劉威煌、陳俞霏同安雅希，嚟緊將攜手開四場演唱會，而且地點好特別，選址喺重新開幕嘅新光戲院。
喺戲院開騷最特別之處，就係同觀眾零距離，所以四位非常期待。威煌話好榮幸成為第一批喺戲院開騷嘅歌手，俞霏就話唱到興奮時，唔排除會衝落台同觀眾互動。
安雅希唱京劇有一手，今次喺戲院開騷，佢就預告演唱一啲中國風嘅歌曲，到時加入京劇唱腔，希望同戲院有完美結合。
四位嘅演唱會仲會加入電影元素，以片段呈現四位追夢嘅過程，場地負責人李居明師傅，仲送出自己創作嘅歌曲，每首歌都有各自代表嘅意義，重點係免收版權費。
