陳偉霆William 同內地超模 何穗 嘅緋聞傳足多年，近日何穗被發現清空微博所有帖文外，社交平台亦經而有多月冇更新，同時佢絕跡公開活動，又未有拍攝雜誌。
何穗突然神隱，惹嚟揣測同William有關，傳對方因秘婚而淡出娛圈，或者懷孕而停工。正忙於拍攝新劇嘅William，呢日就現身上海一個代言活動，雖然佢未有正面回應呢件事，但就話自己呢輪喺橫店拍劇拍到天昏地暗，每日都專注喺個角色入面，又指呢日呢個活動可以話係救咗佢，令佢可以休息一日抽離下個角色呀。
同場出席活動嘅仲有 楊千嬅 同 吳彥祖 ，《新紮師妹》CP再度合體，連William都話勾起佢少年時嘅回憶，仲話自己由細到大都睇咗好多次呢套戲。早前吳彥祖一家三口去亞馬遜森林探險，佢話去完呢次探險之旅後，令佢知道保護呢個地球嘅重要，所以接下來嘅幾年佢都會專心做保護環境嘅事。
11月千嬅將會同歌迷喺紅館慶祝自己出道30周年，佢指終於可以返到自己嘅家—香港開演唱會，千嬅形容呢個對佢嚟講係一個突如其來嘅幸福，同時佢又形容香港站嘅演唱會，將會係一場米芝蓮級嘅私房菜，到時佢會同入場嘅fans一齊去享受呢個非常地道嘅廣東歌盛宴。