洪天明同周家蔚早前傳出13年婚姻亮紅燈，有報道話係因周家蔚愛夜蒲導致婚變，呢日兩公婆恩愛現身自家品牌活動，以行動打破婚變傳聞，天明大讚愛妻為家庭付出，仲主動開腔護妻。
天明話唔介意媒體寫自己負面新聞，但佢為太太覺得唔抵，因為太太係一個為家庭付出好多嘅賢妻良母，家蔚就話自己出道多年，初初會為負面新聞喊，依家已經得啖笑，仲話識佢嘅朋友一定知係假新聞。
家蔚啱啱過咗42歲生日，不過兩公婆各有各忙，所以冇特別慶祝，不過細仔就親手整蛋糕送畀媽咪，相信家蔚已經覺得夠晒sweet！
見到天明兩公婆咁恩愛，兩個孫仔又咁乖，相信洪金寶應該覺得好安慰，洪金寶近年間中要用拐杖或坐輪椅代步，天明就話爸爸洪金寶健康狀況唔錯，日日湊孫為樂，天明仲好感慨自己細個嗰陣爸爸冇時間陪伴，依家見到爸爸成日陪孫仔，覺得特別開心。
