姜皓文聯同導演關文軒、小演員蘇天樂呢日去一間洗衣店為下個月上映嘅新片宣傳。
重返當日取景拍攝嘅店舖，黑哥勾起唔少回憶，仲充當一日店長為大家服務，又為觀眾介紹磅洗嘅程序，講起上嚟有板有眼，睇嚟呢位店長做得唔錯！
戲中黑哥同葉童有唔少對手戲，對方飾演憶子成狂嘅媽媽，佢話每次同葉童同場，現場嘅氣氛都被對方所帶動，大家瞬速入戲。至於講到小演員天樂，黑哥就話自己好鍾意同小演員合作，又指呢次同天樂拍戲好開心，唔好睇黑哥外表惡形惡相，其實佢好受小朋友歡迎，大家都鍾意搵佢玩呀。
黑哥早前同太太去參加咗個辟穀七日營，佢指辟穀並唔係大家想像中咁辛苦同困難，又指自己喺第三日就已經冇飢餓嘅感覺，仲話之後會定時做呢件事。
