《2025香港小姐競選》決賽將會星期日晚8點就會隆重舉行，14位佳麗星期六現身電視城進行泳裝綵排。每位佳麗自信騷出好身材，狀態大勇。決賽前率先誕生既「友誼小姐」獎項，由14位佳麗互相投票選出，上一屆友誼小姐 王汛文 揭曉，1號李尹嫣先拔頭籌成為新一任友誼小姐，喺師姐手上接過鮮花接受祝福。
李尹嫣指事前已經有佳麗覺得佢會得獎，加上行程中經常擔任小班長角色照顧大家，可能就係咁得到大家嘅信任同喜愛。對於得獎心情非常驚喜，亦希望賽事完結後14位女仔會友誼永固，仲透露大家已經約好完賽後食飯聚會。 除咗選出友誼小姐，同日亦抽出一位幸運佳麗試戴后冠，上屆港姐冠軍倪樂琳為幸運兒7號施宇琪戴上，施宇琪笑言知道后冠價值不菲，所以心情既興奮又緊張，但亦都好榮幸成為幸運兒。因為就算最終無緣成為冠軍，未來都可以同兒孫分享，自己曾經戴過后冠。
決賽在即，佳麗們都做好準備面對最後路程。3號蔡華英就話要保持開心心情，上到台就唔會緊張。不過因為自己廣東話唔好，所以都有少少擔心問答環節，亦要苦練到最後。5號曾閱遙就話已經到賽事尾聲，希望自己可以盡情享受最後過程；6號朱文慧就會跟排舞師所講，平時練習將狀態推展到120％，到決賽時刻就算跌，亦會有100％表現。
眨眼一年過去，倪樂琳同王汛文由參賽佳麗變成師姐，二人感嘆時光飛逝之餘，同時亦向師妹大派貼士。倪樂琳提醒大家要有充足睡眠、享受舞台，最重要係開騷前要飲能量飲品，令自己可以保持精神。王汛文一樣認為瞓夠係最重要嘅事，因為比賽只有兩、三個鐘，但完騷後就唔會再踏上呢個台重新比賽一次，所以一定要好好享受！