由 張艾嘉 監製， 許光漢 袁澧林 主演嘅奇幻愛情電影《他年她日》日前喺大嶼山舉行記招，三位聯同導演龔兆平以及藝術總監文念中齊齊現身。呢次活動仲係光漢退伍後首個公開活動，所以一早一班「許太太」就喺活動場地等候，令光漢好感動。
雖然光漢話自己仲未習慣面對咁多攝影機，不過會努力調整好狀態，事關好快就要入劇組拍攝新作喇。早前有報道指光漢會自組工作室做老闆，又會加入漫威宇宙成為《尚氣2》嘅新角色。呢日佢就澄清指講得太誇張，自己未有計劃「出走」，不過就未否認做老闆一事，光漢仲話自己未收過拍《尚氣2》嘅邀請，但會繼續努力，希望未來可以參與喇。 光漢同Angela喺戲中組成一對奇幻CP談情，仲會有吻戲！不過兩位就一啲都唔怕一眾「許太太」嬲豬，Angela仲好識賣口乖，讚各位「許太」都係火辣靚女呀！
張姐將獲第30屆釜山國際影展頒「山茶花獎」，新戲亦入選第今屆釜山國際影展Open Cinema單元，連串好消息都令佢非常驚喜，仲指得獎係好大榮幸，亦多謝大會重視女性，寄語其他女性電影工作者要繼續堅持，張姐仲話會飛到當地親身領獎。
