林家謙一連十場紅館演唱會，分別邀請唔同女歌手擔任嘉賓，星期五、六就分別邀請到 陳慧琳 以及 張柏芝 合唱，林家謙更指原來Kelly係自己人生中，首次欣賞紅館演唱會嘅主角，難怪佢覺得非常具意義喇。
每晚，家謙都會以吊車環繞紅館，邊唱歌邊同「山頂」樂迷近距離打招呼，又會以攝影機影低觀眾舉牌支持畫面。不過第8場佢就忽發奇想，於吊車上同觀眾「自拍大合照」。可惜當空中手忙腳亂，最後只得自己「超大頭」特寫，畫面非常滑稽，令全場觀眾笑到「碌地」。
近日佢邀請嘅嘉賓成為唔少歌迷討論話題，仲有人認為係佢本人員嘅「自肥集郵簿」，而星期五場陳慧琳登場時，家難亦指首次入紅館睇騷就係Kelly演唱會 ：「你真係好特別嘅，因為係我第一個睇嘅紅館演唱會嘅歌手！」更透露當時只得6歲，由表姐帶領入場欣賞Kelly《飛天舞會》演唱會。
Kelly聞言後更大感驚訝，家謙更即指當年「功臣」表姐亦於現場，兩人又隔空同表姐打招呼。
而星期六第9場，家謙就邀請到近年甚少於香港演出嘅 張柏芝 演出，兩人先合唱柏芝嘅《任何天氣》，之後又指自己首張買嘅唱片就係對方嘅專輯，更由工作人員帶到台上要求簽名。
柏芝讚家謙有才華﹐又指：「有一首歌係我新人時好堅持要唱，唔係我自己嘅。公司打嚟話有機會喺紅館表演，我就想唱呢首歌，希望大家每一分每一秒都珍惜身邊所有嘢，我好感恩可以喺紅館同大家一齊唱，呢首歌叫做《留給最愛的說話》。」
《留給最愛的說話》，家謙更一口氣連獨白都背埋，又將當中「令我唔可以趕到呢間咖啡室」，改為「令我爭啲趕唔到紅館」，令觀眾非常驚喜。