已故資深演員黎宣於演藝界貢獻良多，在娛樂圈跨越超過半世紀，早喺上世紀50年代已經從影，70年代開始轉戰電視圈加入麗的電視，及後90年代投身無綫電視，喺TVB呢個大家庭20年期間演出過無數經典劇集。包括《大時代》、《流金歲月》、《皆大歡喜》、《壹號皇庭》系列、《再見亦是老婆》、《法證先鋒》、《帝女花》、《珠光寶氣》、《巨人》等角色數之不盡。
而黎宣令觀眾最深入民心嘅角色莫過於長壽處境劇《真情》中阿家一角，飾演好姨（薛家燕）以及善姨（李司棋）嘅媽媽，喺劇中黎宣要由平日和藹可親嘅感覺大逆轉，演活現實中霸氣奶奶嘅真性情，老戲骨演技深入民心，令觀眾睇得肉緊。而黎宣喺2010年為TVB拍攝最後一套作品《Only You只有您》之後就淡出幕前。我哋一齊同觀眾回顧吓黎宣喺眾多經典作品中嘅精湛演出。
