樂隊Zen成軍30年四子首次合體開騷圓夢，Zen先以連串快歌辣㷫全場，樂迷聽到主音黃和興嘅歌聲親切感重現，尤其係佢走到觀眾席獻唱《I Remember You》呢首經典歌時，更勾起全場集體回憶大合唱，掀起一股共同成長歲月嘅共鳴。
今次四子能夠實現多年嚟嘅夢想，黃和興表示全靠太太嘅鼓勵先成事，並喺騷上公開多謝愛妻令Zen圓夢，因為佢之前曾經同老婆講過Zen未曾開過演唱會，於是太太就開始思考，而黃和興亦覺得自己人生活動到呢個年紀，應該要留下一個美好回憶，加上fans都冇聽過佢哋開騷，所以就共同創造咗呢個畫面，會同歌迷好好珍惜呢一幕。
喺騷上仲出土咗Zen多年前走紅時，喺樂壇嘅頒獎禮片段，回望青春歲月真係有啲認唔出佢哋，當年仲係由天王黎明手中獲獎，片段珍貴，不過當時Leon就誤將Zen講為Sen。為咗今次開騷，Zen特別創作咗首新歌送俾樂迷，成員琛仔仲講笑話可唔可以再戰新人獎，黃可興笑指：「Leon宣布時讀我哋係Sen，我哋以Sen再出發都得喎。」
