郭富城 、 許恩怡 及導演 孔令政 作客《StarTalk》接受主播 王鎮泉 訪問，大談新戲《無名指》拍攝點滴，城城喺戲中飾演家庭遇上巨變、生活潦倒嘅父親，仲有一個患有肌肉萎縮嘅囡囡。戲中角色背景係壁球冠軍好手，城城事前都要學打壁球，務求姿態上似一位壁球好手；再者要不停跟導演溝通，兼且抽離現實生活，去投入做一位不負責任嘅爸爸。
許恩怡喺開拍前，特別去探訪咗兩位患有肌肉萎縮症患者，以及佢哋嘅照顧者，除咗喺傾談中了解到更多實況外，許恩怡亦有睇患者及照顧者喺網上所寫嘅日記，令自己能夠投入更多。城城藉住個案將自己代入去，佢覺得患者比正常人更堅強，因為有時患者未必想照顧者寸步不離，可能都會想有自己嘅空間。
城城覺得呢部作品能夠令大家重新思考各自所面對嘅困難，從而學習去搵方法解決。正如而家唔少人打工仔，因為公司倒閉而收唔到人工，所以今次係一部能夠給予大家正能量訊息嘅電影。佢又分析戲中飾演嘅角色係以自大去掩飾自卑性格，問到城城若果現實生活中面對爭扎又會點做時？佢話「我會堅持，正如佢跳舞受傷時，佢會搵教練訓練番隻腳，然後每晚紥住隻腳喺舞台上演出，而觀眾係唔知。」到完成演出後，先做手術處理傷患。
戲中城城同鮑起靜一幕生離死別嘅場面，路只感動到唔少觀眾，就連導演孔令政都話拍攝時，現場嘅工作人員都畀兩人親切又自然嘅演技所感動。參演完呢部作品，城城同許恩怡都覺得健康係好重要。
