前亞視執行董事盛品儒於8月18號，因肝癌於養和醫院離世，終年48歲。James嘅遺孀蔡一鳳喺31號為亡夫設靈，靈堂佈置典雅，盛太同一對子女嘅花圈放置靈堂中央。
蔡一鳳雙眼通紅，神情悲傷現身，感覺憔悴明顯消瘦，情緒仍然未能平伏。蔡一鳳於殯儀館門前禮貎地感激媒體及各界來送別James最後一程，並代表盛家及兩位小朋友多謝大家關心，請傳媒見諒守喪期間未能受訪，佢透露家人以佛教儀式為James進行守靈禮，遺體翌日移送火化。難掩情緒嘅蔡一鳳，表示每當見到亡夫嘅照片時都會忍唔住喊，而靈堂內所播放嘅James生前片段，有幾百張都係由蔡一鳳親自挑選。
皮草大王後人 王大業 與James屬好友，生前不時見面，對於James離世感突然及可惜，佢透露大約係喺James離世前三天，曾前往醫院探望對方，當時James仍然有意識認得自己，狀況唔算好差，亦唔似報導所形容激瘦，當時只知道有啲嚴重，但就冇過問太多病況。
而再對上一次與James見面，則係喺幾個月前一齊食飯，當時James好精神一切如常，大家仲有傾有講，所以感覺好突然好可惜，對方咁年輕。王大業同James生前亦有好多話題，最難忘係經常交流動漫以及電競資訊，又會講吓亞視。
