張艾嘉同陳庭妮為慈善機構舉行嘅影像展擔任展場導覽，現場同時分享張姐喺非洲探訪嘅紀錄片。張姐擔任公益大使超過30年，包括探訪飢荒、戰爭在內嘅無數地區，過程雖然辛苦，但可以親眼見證受資助兒童健康成長，相信係最大嘅安慰。
張姐話喺探訪中見到兩位受資助嘅兒童，精神奕奕着住制服現身眼前，有一種小小嘅驕傲；佢又指接觸當地兒童，就會發現佢哋係最友善嘅，只要同佢哋傾談，佢哋就會視你為朋友。
擔任監製嘅新戲入選今屆釜山影展，張姐更得到影展頒發「年度山茶花獎」。由於呢部份係台灣男神 許光漢 退伍後嘅回歸作，令唔少人都好期待。張姐大讚兩位演員光漢同 袁澧林 都非常匹配，佢又讚拍攝團隊好齊心，大家唔只放下身段，仲甘願降價，一齊合力完成作品。
陳庭妮同 胡宇威 上年宣布婚訊，不過兩人嘅婚禮就遲遲未有消息，妮妮指如果有時閒同好嘅場地就會舉行，但婚禮係未必一定會舉辦嘅事，因為發現辦一場婚禮需要花好多錢，加上自己着過好多次婚紗，心中冇話一定要着婚紗嘅夢，加上兩人工作太忙而夾唔到時間。
