《2025年度香港小姐競選》三甲出爐，冠軍由大熱26歲嘅9號 陳詠詩 膺冠軍，亞軍由26歲嘅7號 施宇琪 奪得、季軍則為27歲嘅13號 袁文靜，而21歲嘅1號 李尹嫣 雙料獲友誼小姐及最上鏡小姐。
完騷後得獎佳麗由親友陪同現身《2025香港小姐美麗無限》，接受主持 許文軒 訪問。獲爸爸同妹妹專登回港支持嘅陳詠詩，獲獎後相當感動，坦言一直以運動員思考平靜心態對待比賽，所以可以話係興奮多於緊張。而整晚比賽中，佢最緊張係問答環節，笑言自己已盡力發揮創意回答。
施宇琪Angela 嘅外籍爸爸亦現身力撐女兒，Angela對獲獎相當意外，自嘲以前係肥妹一名，亦唔屬於好靚嗰種女生，但經過今次證明毅力可以戰勝一切同美麗。
袁文靜 憑住真我個性得到評判同觀眾歡心，獲爸爸媽媽一同見證重要時刻，佢話當初參賽目標係想學廣東話同識多啲朋友，但就冇諗過會進入三甲。
李尹嫣自言比較鍾意舞台表演，喜歡望鏡頭展現魅力成為佢嘅日常，所以好開心得到「最上鏡小姐」及「友誼小姐」，盼同佳麗們友誼永固。
14位佳麗喺決賽夜施展渾身解數競逐冠軍寶座，最後由1號李尹嫣、3號蔡華英、7號施宇琪、9號陳詠詩及13號袁文靜晉身五強。
決賽夜先由張敬軒打頭陣率領眾佳麗登場，氣派十足。之後到李治廷獻唱時，佳麗們則以catwalk登場。喺才藝表演環節中，唔少佳麗嘅表演都令觀眾同評判大開眼界，當中 1號李尹嫣演唱粵曲宣揚廣東文化、9號陳詠詩表演藝術體操、10號文雅儀花式跳繩及13號袁文靜表演Rap等都令人拍案叫絕。
而喺全城觸目嘅泳裝環節中，佳麗們一出場即進行首輪淘汰，2號甘詠寧、8號岳凡荻、12號庄靜璟以及14號何詠多失守無緣競逐寶座。
表演嘉賓之一衛蘭帶領佳麗進入愛麗絲夢遊仙境，佳麗們與小朋友一齊以輕快舞步演出。壓軸嘉賓由大師姐鄺美雲艷壓登場獻唱《我們的家》。
