上月27號係 Yoyo陳自瑤 嘅生日，雖然佢正忙於拍攝新劇《玫瑰戰爭》，但佢都有抽時間同兩位好姊妹 沈卓盈 同 徐菁遙（原名 徐淑敏）一齊慶祝，Yoyo喺9月1號就PO出兩人為佢馬拉松式慶祝生日嘅相。
相中所見，沈卓盈同Suki先喺22號晚同Yoyo食生日飯，提早同對方切蛋糕慶祝。而另一組相，佢哋就去到被喻為深圳泰國菜天花板嘅泰菜餐廳慶祝，呢間餐廳大有來頭，廚師除咗係曼谷十大名廚之一外，餐廳更連續七年被評為米芝蓮一星餐廳。
呢餐生日飯儀式感相當足，單位枱面，餐廳就用咗紅色嘅砂喺枱面排出「Happy Birthday YOYO」嘅字樣，再鋪上玫瑰花瓣，完全滿足到女士打卡嘅要求。壽星女Yoyo睇嚟亦相當滿意，喺帖文中表示：「感謝兩位美人為我馬拉松式慶生，滿滿的儀式感……有你們真好！🎂🌹🫶🏻🥰」Yoyo又指唔少人都話佢哋三個好似樣：「好多人話我哋三個好似樣，睇睇下又真係幾似樣😂🤭」
