65歲文雪兒近年減產享受家庭樂，兩位愛女張筠（Christy）與袁萃（Jennifer）先後結婚生B，文雪兒湊孫為樂，前日喺社交平台開心宣布家有喜事又添孫，仲叫大家估吓今次係男孫定女孫，不過就有畀提示係「粉紅色」，今日佢就再貼出三個孫溫馨合照，話「以後妹妹有兩個哥哥錫啦」！
文雪兒日前喺日本拍完電影即返港睇孫女，見頭髮濃密嘅孫女喺育嬰箱乖巧熟睡，非常可愛。文雪兒今年4月接受好友鍾慧冰節目訪問嗰陣，透露大女Christy育有一子，細女Jennifer三年抱三，當時鍾慧冰忍唔住讚Jennifer好生養，文雪兒亦笑言：「我睇佢個樣，如果我有個仔，一睇呢個女仔，都會話呢個娶得過、好生得。」文雪兒話細女由細就鍾意小朋友，希望生多啲，而細女都鍾意自己湊B。
文雪兒於1986年結婚後息影，生咗大女Christy及細女Jennifer，可惜婚姻維持8年便結束，文雪兒獨力撫養兩個女，文雪兒喺2005年覓得第二春，與任職建築師袁慧明再婚，繼父將Christy及Jennifer視如己出。大女李佳怡隨母親姓張，改名為「張筠」，細女李佳欣則改名「袁萃」，大女Christy畢業於英國UCL土木工程系碩士，現職土木工程師，而細女修讀傳理系課程，畢業後幫媽媽打理美甲店生意。
