黃子華 被奉為子華神，早前主演嘅唔同主題電影票房大收，更一洗佢多年前票房毒藥稱號。雖然電影市道不景，不過月前就有電影公司宣佈已邀請子華同Sammi合作開拍喜劇電影，令唔少朋友都非常期待。
星期五就係黃子華嘅65歲生日，早前曾與子華合作《香港式離婚》舞台劇嘅 劉嘉玲 就相約多位好友為子華預祝，好似上星期先慶祝完生日嘅上山詩納、蝦頭楊思敏、楊淇、蘇玉華與潘燦良等好朋友，不過當中最引人注目嘅，就一定係以雙手環抱壽星嘅女士，見佢面帶羞澀笑意，又刻意低頭未能一見盧山真貌，而子華則自在微笑非常受落，似關係匪淺。
子華感情生活備受外界注目，過往幾段情都未能開花結果，早年曾與潘芳芳相戀，後來先後與模特兒及化妝師拍拖，十多年前就被指與神似台灣歌手范曉萱嘅女友相戀，早年更曾盛傳佢因拍攝《男親女愛》與Do姐嘅緋聞而令情海翻波險生憾事。
