谷婭溦、周吉佩、羅啟豪、譚輝智與黃劍文 30號晚喺啟德體藝館舉行嘅演唱會圓滿結束。演唱會以「五大行星」為主題，由「金星」周吉佩打頭陣，五人輪流出場獨唱後，再合體合唱《星秀傳說》，令台下fans忍唔住一齊跳。
「土星」譚輝智除咗獻唱慢歌外，當然唔少得晒一晒「譚式舞技」，原來演唱會當日係輝智嘅囝囝生日，由於未能陪對方慶祝，所以輝智喺台上搞笑咁話：「以前仔仔生日我一定陪佢過，今年唔好意思，要仔仔陪我喺度過。我知道你一定好難過，我就送上一首《我知道你很難過》比你。」
「水星」羅啟豪深情演繹《歲月流情》、《有天做證》，令歌迷聽得如痴如醉；「火星」谷婭媺先以一曲《火》令現場升溫，之後再唱出《明星》、《你把我灌醉》等歌曲，盡顯其爆發力。
至於「木星」黃劍文則大騷舞技，跳唱《Baby One More Time》及《夢伴》。不過最令觀眾驚喜嘅，係劍文同吉吉合唱最近熱播嘅《用背脊唱情歌》，吉吉身上嘅白色外套，除咗正面可以若隱若現咁見到腹肌外，當吉吉擰轉背時，仲可以清晰見到背肌，對此吉吉笑謂：「為了今次演唱會我努力練胸肌、腹肌，點知設計話我知今次露背脊，所以下次都係要練全套。」
而喺最尾一個環節，周吉佩、羅啟豪、譚輝智與黃劍文化身港版「中年F4」合唱《流星雨》，勾起觀眾唔少回憶。至於Encore環節，眾人以連串快歌Medly成功令全場觀眾企晒起身邊唱邊跳，期間吉吉仲興奮將自己及輝智嘅外套脫掉，齊齊派福利騷肌，搞到台下歌迷尖叫聲震天。
