64歲張學友近排忙於開巡迴演唱會，原本佢喺6月6號至6月8號舉行東莞站個唱，當中兩日與內地高考撞期，被市民投訴，指附近亦有考場，希望演唱會延期，最終主辦方改期至8月29號日至8月31號舉行，東莞站演唱會噚晚去到尾場，學友唱到一半，無奈喺台上突然宣布演唱會終止，獲歌迷暖心鼓勵。
學友當晚巡唱第277場，透露由開場嗰陣已好難控制到自己把聲，仍然盡全力表演，佢承認爛聲係冇辦法過到自己嗰關，又指後面嘅歌係越嚟越有難度，學友坦言冇把握可以完成到呢晚嘅演出，佢知道對Dancers及幕後工作人員好唔公平，因個人嘅關係，要喺度終止個唱，學友覺得非常抱歉：「我好憎好憎我自己去取消演唱會，好憎，何況喺東莞呢度，今日係第二次……上一次唔關我事㗎！我都想唱，不過就冇得唱，今次都想唱但唱唔到……」
歌迷聞言即不停為偶像打氣嗌加油，為學友送上安慰，學友又指中途腰斬，自己都唔知點收科，又問係唔係自己轉頭行返入去，大家就散咁樣，佢再問係唔係應該繼續做落去，自己喺跳舞同做一字馬係完全冇問題，仲係非常好身手，但係佢覺得演唱會如果唔能夠演唱，就冇辦法成為一個演唱會。
學友即場同歌迷商討退票方案：「大家聽到我把聲都係沙沙地，繼續做落去真係冇乜把握，睇咗半場啦大家，係咪先？睇咗半場，大家而家返去退飛都係冇問題㗎，係咪？」 學友坦言好想完成演唱會，自己喜歡唱歌嘅程度係鍾意到發癲嗰種，佢喺頭先就算把聲爛晒，都仲係想繼續唱落去，唱得幾多得幾多，不過學友唔想令團隊嘅努力白費，自己會好難過，希望觀眾與在場每一位好好保重身體，希望下次再開演唱會有機會見到大家，請大家盡情享受餘下未必狀態最好嘅演唱會，說罷就請歌迷陪自己大合唱《你最珍貴》。
聽到現場觀眾不斷鼓勵，學友決定頂硬上完成尾場，仲話自己可以唱少啲，佢續言：「不如咁喇！反正我做到而家，不如我繼續唱，唱到真係唱唔到，你哋咪退飛，好冇？」學友演唱會順利撐至完場，歌迷亦叮囑偶像好好休息，學友完騷後戴上口罩向歌迷揮手致意，佢便返港休息。