《女神配對計劃》人氣CP嘅葉蒨文（Sophie）及曾展望（GM）大受觀眾歡迎，仲收穫好多工作機會，呢日二人首度以CP姿態獲邀出席一個開幕活動搵真銀，同場仲有陳家樂與連詩雅兩公婆一齊恩愛亮相。
Sophie同GM今次以白色盛裝登場猶如預演婚禮，佢哋日前擔任港姐司儀，雖然GM臨尾有少少失誤，但係二人全晚表現均獲讚賞，Sophie大爆GM之前做運動扭傷腰，嗰日係戴腰封忍痛上陣，Sophie則患支氣管炎，病咗一個月，綵排完佢凌晨去醫院換藥，Sophie喺上台前要用哮喘藥物，又要多飲水，盡量唔想喺台上咳，全程要靠意志力去忍住。
此外，家樂早前帶阿女Camila出席公司生日會，可愛嘅Camila頓時成為焦點，連詩雅爆家樂呷醋唔准阿女錫其他男孩，家樂就解釋如果係小親親就OK！
