陳曉東入五生日派對 宣布明年紅館個唱會爆肌演出

今個月3號就係 陳曉東 嘅50歲生日，呢日佢提前同fans慶祝，兼宣布好消息下年年中將會舉行紅館演唱會呢個好消息呀！大會仲用AI整咗幾張未來東東嘅合成照，其中一張仲係爆肌照，東東睇完就話自己而家個body已經係咁，台下fans聽到即起哄叫佢除衫，而東東接受訪問時，就承諾到時會有六嚿腹肌。

大會整嘅合成照中，仲有一張係預告十年後東東囡囡大學畢業嘅相，事實上東東囡囡剛升上中學，佢就話因為囡囡大個咗，所以自己都想多啲時間留喺香港工作。東東又讚囡囡好乖，雖然剛剛踏入青春期，但因為佢係一個好開放嘅爸爸，所以佢哋咩都會傾呀。