甄子丹 同 汪詩詩 呢對模範夫妻，日前啱啱度過22周年結婚紀念，早前佢哋仲趁暑假，帶埋一對仔女去倫敦旅行，詩詩亦有喺社交平台分享呢次旅行嘅甜蜜碎片，佢表示：「太多的美食、精彩的演出、與好友相聚，還見到Mary J Blige及50 Cent。」
相中所見，一家人幸福滿瀉，囝囝James仲已經高過媽媽喇，佢哋一家除咗好寫意咁去遊湖、品嚐美食之外，又仲去咗體驗大熱韓劇《魷魚遊戲》主題活動。詩詩仲話諗唔到自己會贏添呀。而呢次嘅旅程，佢哋一家亦同好友 呂良偉 同埋 楊小娟 碰面，玩得非常盡興。
遊完倫敦之後，詩詩原來又約埋媽媽、妹妹汪圓圓等轉到奧地利嘅維也納同薩爾斯堡遊玩。首次踏足維也納嘅詩詩表現得非常雀躍，不時喺唔同景點拍片打卡，佢表示好開心旅程其中一站，就有機會到電影《The Sound of Music》嘅取景地，仲話第一次到維也納，就被周圍嘅音樂、歷史、花園同水果包圍呀。
