陀緊第二胎嘅Coffee（林芊妤），雖然腹大便便，但係日前佢趁阿仔開學前，同佢去咗水上樂園玩，本來係好開心、好滿足咁迎接新學年嘅開始，點知喺開學前夕，Coffee同升讀小二嘅囝囝一齊執書包時，先發現自己唔小心掉咗阿仔已完成嘅暑期作業。
Coffee早前幫阿仔執房時，唔小心將阿仔本暑期作業連同小一嘅舊書一齊掉咗，Coffee頓時感到崩潰，阿仔既傷心又好擔心被老師鬧，Coffee相當自責，仲自嘲係大懵同蠢嘅豬隊友媽媽，Coffee話最初得悉呢件烏龍事一刻，曾經諗過逃避，唔想話畀阿仔知。
Coffee後嚟調整咗心情，表示醜婦終須見家翁，決定坦白向阿仔「自首」兼道歉，更寫咗一封信及打電話畀老師親自say sorry，幸好老師明白事理，仲叫佢唔好咁自責，話學習過程先係最重要，得到老師體諒，Coffee如釋重負，仲話唔會再做大頭蝦呀！
