胡杏兒 劉穎鏇 同 王丹妮 盛裝現身一個時裝騷，早前同老公帶埋三個囝囝一齊去馬爾代夫旅行嘅杏兒，解釋當時未分享泳衣照，係因為嫌自己身材未夠Fit。而對自稱「擁抱者」嘅老公日前被指「回歸夜店」，杏兒就覺得冇問題，仲話係好正常嘅社交，仲話老公不嬲無論男或女、甚至年紀大嘅朋友都會攬，所以叫大家無需太過驚訝。
至於而家去老公去夜店會唔會通知佢？杏兒就話：「唔會喎，唔需要喎，因為唔係而家，一直以嚟都會話比我知佢喺邊度。」
邱淑貞被封為「最美星二代」嘅大女 沈月 早前慶祝24歲生日，佢指今年叫朋友折現當生日禮物，因為自己唔需要物質上嘅禮物，反而想做善事幫更多人。而早前佢同妹妹沈日一齊影宣傳相，佢話過程非常好玩，仲大讚妹妹雖然開頭有啲緊張，但最後都發揮得好好，好叻女。
而以破格超短髮型示人嘅Louise令人眼前一亮，佢指今次係為咗電影角色而剪短髮，仲話剃頭當日忍唔住喊，不過成個造型就令佢更易投入角色啦，又話洗頭有啲唔習慣，不過慢慢就覺得幾爽，老公羅孝勇更讚佢似型男韓星，令佢開心到心花怒放。
