港姐幾位得獎佳麗包括 冠軍陳詠詩 亞軍施宇琪 季軍袁文靜 仲有 最上鏡小姐兼友誼小姐 李尹嫣 再度現身領獎活動，幾位經過競選嘅洗禮後，終於可以好好休息，Stacey仲笑言係多月來首次瞓足9個鐘，非常滿足呀。
除咗休息之外，之前一直節食保持體態嘅大家，亦都可以放鬆一下，Angela就一口氣食足廿多件壽司解饞，不過佢亦都指身為亞軍，只可以輕輕放縱一星期咁話。而Jane就指自己因為要回覆親友嘅祝賀短訊，所以都未有太多時間休息呀。Victoria就話會把握時間休息，仲話有唔少感言想多謝親友，不過就需要一啲時間準備喇。
各位佳麗合共獲得600多萬獎金同獎品，不過佢哋就未決定點樣運用，大家仲不約而同唔特別打聽會領咩獎，等到場時更加驚喜開心咁話。
一向談吐幽默有趣嘅Angela，提到仍未完全消化自己得亞軍嘅喜訊，佢指本來已計劃選後投入求職之路，所以要沉澱一下先。而Jane就指已經暫停做Gym應付選美一段時間，所以希望做運動抒壓喇。
