林峯、張繼聰及鄧麗欣（Stephy）首度聯合開騷，呢次請咗古天樂聲音導航，三人仲唱跳大熱快歌送驚喜，阿峯搵胡子彤擔任嘉賓，一齊chok爆舞台，而阿聰唱到興起忽然自度「令山轉」搶fo成為焦點，佢笑言mood到就轉一嘢！
阿峯同阿聰因合作電影版《尋秦記》變得好老友，阿聰大爆喺該戲飾演秦始皇嘅阿峯鮮為人知嘅一面，原來一向敬業嘅阿峯為咗唔想在場演員同工作人員等候，每次轉場都跑住埋位，阿聰仲笑問大家有冇見過秦始皇跑。
阿峯呢日狀態大勇，不過佢喺騷前一度失聲，阿峯感謝拍檔鼓勵及體諒，Stephy仲介紹中醫針灸救場，阿峯笑指用「常在心」把聲就感覺冇咁聲沙，不過佢話自己有啲頂唔住，把聲仲有啲似志偉哥。
今次阿峯、Stephy同阿聰喺演唱會尾段，一齊跳Cookies經典歌《心急人上》，三人展現可愛一面，Stephy爆阿聰喺台上加咗好多嘢，同綵排嗰陣唔同，阿聰笑言見到台下好多中年男士，大家眼神交流時，佢被激發少女心。Stephy被問到男友Bryan低調捧場，Stephy估唔到大家捕捉到佢男友，仲話自己叫男友狂拍片，想知男友視角睇咗啲咩。
