大熱戀愛真人騷《女神配對計劃》最後告白篇，將會喺下星期一(9月8號)起登場，一星期播足五晚，而星期日(14號)晚就會播出Final Chapter。
呢日五位女神同其中十位求愛勇者現身記者會宣傳，各位求愛勇者率先向自己嘅女神進行最後告白，林俊其指希望2025年後同 羅毓儀 有更多兩人嘅事可以發生、Eddie就話今次追女仔見到一個新領域就係「GM級」，GM就稱開心可以同Sophie經歷一次校園生活，因為佢唔想錯過Sophie嘅每一秒，真係又sweet又骨痺呀﹗而Matthew就表示雖然 關嘉敏 啲冷笑話唔太好笑，但每次自己都忍唔住笑出聲。
不過最令女神們感動嘅，係未有到場嘅金牌媒人 阿Bob ，事自錄低一段勉勵嘅對話，令五位女神聽完好似開水喉一樣，變咗喊包嘅Yuki話，無諗過阿Bob會用自己嘅私人時間去關心佢，而Sophie都話阿Bob可以睇穿自己嘅心事，令佢覺得好有爸爸嘅感覺。
節目大受網民歡迎，呢日亦宣布好消息，節目喺TVB官方社交平台嘅影片總觀看量近7千萬次，互動量超過196萬， 李芷晴 仲話喺節目中，感受到人生中最浪漫嘅時刻。