校長譚詠麟、黃日華日前作客范振鋒主持嘅電台節目，同行嘅香港明星足球隊隊員包括：趙浚承、林迪安、李雨陽、葉泓聲與及「老六兄弟」其中五位成員衛志豪、張智軒、潘梓鋒、莫家淦同羅鈞滿，一齊宣傳明星足球隊嘅第一首會歌《完美拍檔》。
譚校長話今年係香港明星足球成立40周年，咁多年嚟到過唔少地方作慈善演出，佢發覺東南亞嘅朋友以為《朋友》係我哋會歌，而內地就以為係《講不出再見》。於是就決定喺呢個值得慶祝嘅年份，製作第一首會歌《完美拍檔》，並由譚校長與黃日華共同監製，譚校長話：「暫時只有國語版，希望大家識得聽大家唱乜，哈哈！仲有Rap。由其中一位負責守龍門，本身係製作人的內地隊員的團隊作曲、填詞及編曲，好有現代氣息。」
去年鬧出叻哥陳百祥將明星足球隊分家事件，一度傳出譚校長與叻哥不和，直至日前譚校長生日派對上，兩人合照破冰，呢日宣傳會歌時，譚校長突然感激話：「開心大家庭永遠都一條心，冇第二把聲！」此話一出，成班隊友就笑指譚校長有弦外之音，有人哈哈大笑問校長：「想講咩呀？一次過講晒喇…..」校長即騎騎笑地，馬上轉移話題在林迪安(教頭)身上。
阿范問大家對邊位隊員錄音時唱歌感覺最深刻？大家齊指華哥，華哥笑言：「我係主音歌手嘛，我錄時間最短，只係兩剔就搞掂。」譚校長接著笑指：「最快係佢，有四句，有幾十個字(歌詞)！」再問到譚校長邊位唱得最好？校長讚大家都唱得好好，並指呢首歌出世得好突然：「有一晚，大家踢完波，食食吓飯，傾偈話不如作首會歌，就咁成咗事！咁啱作曲的劉佳也在場，漏夜即做，第二朝已收到Demo，下午就即刻在香港的錄音室錄歌。第一次聽Demo已好好聽，旋律輕快，有Rap又有新唱法。」
