林雪以大隻形象同幽默風格一直備受觀眾喜愛，不過近年香港電影業進入冰河時期，唔少演員都受影響需要變法搵食，育有一對仔女嘅林雪都要往內地發展，唔只拍戲，仲積極經營自媒體平台。
林雪喺內地都有唔少忠實影迷，加上佢嘅說話風格絕核搞笑，所以近年都被內地一個地圖App睇中，合作推出導航語音包，令唔少網民驚喜之餘亦大力支持！作為老戲骨嘅佢亦非常珍惜每次拍戲機會，即使受傷都堅持工作。
有內地媒體近日喺社交平台以「61歲演員林雪片場求職」為題出片，指林雪拍攝內地電影《脫韁者也》前不幸手筋斷裂，但因為擔心會被換角而堅持拍攝。片中可見，林雪喺完成拍攝後向導演90度鞠躬致謝，仲對鏡頭自薦「搲撈」，表示：「再找我呀，我演配角，可牛了」佢嘅誠懇謙卑態度亦得到網民大讚敬業樂業，精神可嘉。
