GM曾展望 、 Sophie葉蒨文 從戀愛綜藝節目《女神配對計劃》收獲唔少粉絲，當中不乏二人CP粉。日前兩位分頭出動為茶飲店擔任一日店長，現場人頭洶湧， Sophie都好驚喜場面會咁墟冚。Sophie就話細個試過做服裝店店員，但講到做茶飲店，負責沖茶都係第一次，體驗好新鮮。
至於GM嗰邊，就有唔少粉絲帶埋佢同Sophie嘅CP嘅名牌到場支持，而且粉絲年齡層都幾廣泛，連負責採訪嘅泉叔王鎮泉都形容離遠已經感受到GM嘅強勁人氣同星光。GM好感恩可以得到咁多喜愛，仲話收到唔少粉絲提供良策同提議，好多謝大家支持自己、為佢提供咁多建議。
《女神配對計劃》最後告白篇下星期一起就會喺翡翠台逢星期一至五晚上十點半播出，14號晚上八點就會播出最終章，GM預告大家喺節目真情流露，連好少講嘢嘅攝影師都邊拍邊感動落淚，大家切勿錯過喇！
