四位2025香港小姐獎項得主繼續馬不停蹄，出席各大領獎活動，呢日仲有兩位師姐朱千雪與馮盈盈頒獎。決賽當晚盈盈以性感晚裝登場，艷壓全場，亦好有眼光貼中陳詠詩奪冠。原來四位得主都係Tracy嘅心水，兩位師妹果然係智慧與美貎並重。
Tracy同盈盈見證一班師妹決賽表現，都有勾起當年參選嘅畫面，Tracy話若果而家再參選，都未必答到師妹們被問嘅問題，亦未必有師妹們嘅勇氣同狀態。盈盈話喺後台見到一班師妹互相提點畫面，即刻諗起參選時，充滿青春少女嘅感覺。
最近Tracy跟老公帶同一歲大嘅囝囝去越南度假，因為着住鬆身裙而惹起再度懷孕嘅疑雲，不過Tracy就未有回應，反而大談囝囝去旅行嘅點滴，佢話今次係囝囝識行後首次去旅行，全程都極度精靈，同時又消耗佢大量體力。
出爐冠軍Stacey被爆喺美國讀書時認識學霸Martin，兩人拍拖近兩年，Stacey大方承認戀情，仲同男友慶祝奪得港姐后冠，最上鏡小姐暨友誼小姐嘅李尹嫣透露希望稍後一眾佳麗夾到時間，就相約食飯聚面。
談到未來嘅發展方向，Stacey就對演藝方面有興趣，但因為未試過，唔知道會否有天份。亞軍施宇琪就想喺司儀同主持方面發展，因為會較適合自己嘅性格，佢定下一、兩年時間嘗試，若果成績太差就繼續喺金融方面工作。Victoria就希望加入TVB藝員訓練班學習，增加自己技能，再留意適合邊方面發展。季軍袁文靜都想作更多挑戰，佢仲透露度梗新嘅Rap詞，遲啲同大家分享。
