農夫廿年後再與麥玲玲合體 預告會以新風格巡迴演出

農夫喺20年前同麥玲玲嘅合唱歌《風山水起》唱到街知巷聞，20年後佢哋又會再合體喺廣州開騷。三人日前現身廣州出席巡迴演出大計嘅記招，吸引大批粉絲捧場。C君話今次有別於以往演出，今次唔係演唱會同埋棟篤笑，而三人之前都分別做過一啲講座，如果合體一齊做，加上農夫有啲歌曲能夠配合玲玲師傅所講嘅內容。

C君指平時農夫開騷，大家都會問玲玲師傅喺邊，佢話好難先請到玲玲師傅，要好似今次咁特別開個騷先請到佢。陸永再補充話騷上唔只三人唱歌同講嘢，觀眾都有機會同玲玲師傅交流。講到服飾方面，C君話睇宣傳海報就知，佢同陸永係豁咗出去同玲玲師傅統一服裝，不過上到台，C君就話會以自己風格示人。至於會否有新嘅合唱歌，C君就話唔會，因為上一首已經係出盡九牛二虎之力。