周勵淇（Niki）於8月30號生日正日，喺澳門舉行演唱會同歌迷慶祝入行25周年兼慶生，Niki仲請咗同佢同月同日生日嘅閨密 楊茜堯 做嘉賓，二人合唱《終身美麗》令歌迷都好開心！Niki就話好高興喺劇集《再創世紀》同茜堯合作，雖然二人並唔係經常通電話，不過一聯絡就可以講唔停口，而且想法一致。而兩位壽星女嘅老公傅浤鳴、羅子溢更聯手送驚喜，推住大蛋糕出嚟同兩位壽星女慶生，相當有儀式感！
久未開騷嘅Niki亦請到唔少老友助陣演出，包括 馬天佑 以及兩位炙手可熱嘅音樂監製 徐浩 同 周錫漢，Niki同兩位合唱劇集《百分百感覺》嘅主題曲《兩男一女》，即時勾起大家嘅集體回憶。
演唱會尾聲，Niki以經典金曲壓軸演出，當唱到《可惜他有女朋友》時，Niki見到歌迷熱情支持，唱到一半都忍唔住感動落淚。
